SOMO LA UONGOZI

LEADERS POSITION AND ABILITY.

NAFASI YA KIONGOZI NA UWEZO.

1.     Kiongozi ni lazima awe msimamizi wa mambo.

a)     Andaa watendakazi – Organize Workers. Kuandaa Watenda kazi ni kazi ya Kiongozi. Shirikisha watu wengine huduma za Kanisa.

b)     Andaa Utendaji – Kama vile Mikutano ya Injili, Mikutano ya Vijana, Kina mama, Watoto na kila kazi ipangwe kwa Utaratibu.

c)     Tawala mambo ya Fedha. I Timotheo 6:10 Ebr 13:5

d)     Gawa Watendaji, wapange watenda kazi ili uwepo daima katika Uwepo wa Roho Mtakatifu.

2.     Uwe na Uwiano mzuri “BE BALANCED MAKE TIME FOR ALL THESE”.

a)     Uwe na muda wa kusoma.

b)     Uwe na muda wa Maombi.

c)     Uwe na muda wa kuhudumia familia.

d)     Uwe na muda wa kufanya mazoezi.

e)     Uwe na muda wa kupumzika.

f)      Uwe na muda wa matembezi.

g)     Uwe na muda wa kuwa Ofisini.

3.     Uwe mtu mwenye huruma, “BE COMPASSIONATE” Neh 1:4

a)     Kugusa wengine.

b)     Kufundisha wengine.

c)     Kumgusa Mungu.

d)     Gusa wenye masikio ya kusikia.

e)     Gusa wenye kujisikia.

f)      Gusa mikono ya wengine iwafikie wengine.

Watu wa muhimu ambao wanatakiwa wawe na huruma ni watumishi wa Kanisa, maana Roho inayokuwa ndani ya Kristo inakuwa ndani yetu. Zile tabia zote za Kristo zinakuwa ndani yetu. Mith 19:17 Kut 23:21  Kumb 15:7-8  Mith 21:13      28:27

4.     Simamia kuyatenda yale uliyosema, “BE DELIGENT” Hes 18:26-32. Fanya kile unachofundisha Ezra 7:10. Toa sehemu ya kumi, Sadaka, Shukrani na michango mingine.

5.     Uwe na Mzigo mkuu – BE ETHUSIASTIC.    Kama kiongozi, jitahidi kumshukuru Mtenda kazi mwenzako hata kama hakutenda vizuri. Tusianze lawama mbele ya wale tunaofanya kazi nao.     Mwishoni waweza kumwonyesha kile hakufanya vizuri.

6.     Uwe mwaminifu – “BE FAITHFUL”

a)     Kwa Mungu.

b)     Kwa kusanyiko lako.

c)     Kwa Huduma yako.

d)     Kwa muda.

7.     Uwe Mlinzi mzuri – “BE A GUARDIAN”

a)     Linda kundi.

b)     Linda wale wenye migawanyiko.  I Kor 3:3  Rum 16:17   Tito 3:10  IKor 1:10.

c)     Epuka masengenyo na Wivu.

8.     Uwe mnyenyekevu “BE HUMBLE”

a)     Uwe mnyenyekevu kutumika kwa mikono yako.

b)     Yesu naye alikuja kutumika siyo kutumikiwa.

9.     Ujihusishe – Husika – BE INVOLVED.

a)     Wewe kama Kiongozi husika katika matukio yote.

b)     Jihusishe na Vijana, Kina mama, Wanaume na watoto.

10.  Uwe mwenye haki na usawa, “BE JUST AND FAIR”

a)     Wakati wa maamuzi Usiamue kwa upendeleo.

b)     Vitu vyote viwe kwa wote.

c)     Pokea wote sawa sawa.

d)     Wanatakiwa watu aina mbalimbali Kanisani.

KANUNI MUHIMU KUHUSU VIONGOZI NA WATAWALA WA KANISA.

1.     Kiongozi wa Kiroho ni mtu anayeweza kufikiwa na watu kwa Urahisi. Neh 1:2

Mfano mzuri: Tunajifunza kutoka kwa Nehemia 1:2 wakati watu walipokuwa wametoka Yuda Nehemia alijitokeza kuwasalimu na alichukua muda kuongea nao. Huu ni mfano ulio mzuri kwetu kufuata.

Wakati wetu tunao viongozi wengi wenye kiburi na majivuno, huwezi kuwaona kwa Urahisi, hadi wengine wameweka kiwango cha fedha ili upate kuwaona.

2.     Wewe kama Kiongozi uwe na shauku ya kutaka kujua jinsi wengine wanavyoendelea Neh 1:2

Nehemia alihitaji kujua habari za watu wengine jinsi walivyokuwa wanaendelea. Nehemia alikuwa na maono yaliyopanuka si maono finyu. Na viongozi walio na mafanikio ni wale wanaopendelea kusikia na kuona wengine wakifaulu.

3.     Kiongozi Sharti ajue jinsi ya kukabiliana na taarifa mbaya zinazomjia. Neh 1:3

Kwa kweli hatuwezi kutegemea kupata habari nzuri kila wakati, kwa maana hiyo Kiongozi anatakiwa kusitahili kuwa na moyo mkuu ulio tayari kusikia na kupokea habari mbaya na kuweza kuikabili na masaibu yake. Neh 1:3

4.     Kiongozi mzuri wa kiroho ni Yule ambaye ni Mwombaji. Neh 1:5

Kiongozi unapoweza kusikia habari za kutatanisha sharti uchukue hatua za kuomba Mungu juu ya jambo hilo na kumkumbusha juu ya Ahadi zake, Neh 1:6-8. Kwa hiyo Omba Mungu afanikishe malengo yako Neh 1:11.

Kabla ya kufanya maamuzi Kiongozi sharti ufanye Maombi, Neh 2:4. Usijitegemee akili zako Uwe na bidii kuomba Mungu kabla ya kufanya Maamuzi yoyote kwenye Mikutano au vikao vya kanisani. Kama Viongozi watakuwa makini kuhusu hili mitafaruku na kutofanikiwa kwa Miradi kungepungua, tuwe kama Yesu alivyokuwa.

5.     Viongozi sharti wajue jinsi ya kuutumia muda ili kujituma. Neh 2:6

Kila kiongozi ambaye ana hamu ya kuwa Kiongozi bora sharti ajue jinsi ya kuutumia muda wake vizuri na kupanga ratiba ya kazi, kama Nehemia 2:6

Jua jinsi ya kupanga kazi na kutazama mbele unakokwenda, kile kinachosumbua moyo wako ndicho kitakachosukuma mikono yako kutenda kazi na kuisukuma midomo yako kuomba.

Nehemia alimpa ratiba Mfalme juu ya mikakati yake ya ujenzi wa Yerusalemu. Viongozi wengi huwa hawana ratiba wala misimamo na maneno yao hayawezi kutegemewa.

Malengo yasiyo na mwelekeo na muda maalumu hayawezi kumshawishi au kumhamasisha mtu yeyote. Biblia inasema---ndiyo yenu iwe ndiyo na siyo yenu iwe siyo.

6.     Viongozi wazuri wa Kiroho ni wale walio na uwezo wa kuona mbali. Neh 2:7-8

Nehemia aliyefaulu kuwa kiongozi bora, anatufundisha jinsi yeye alivyoona mbali matatizo ambayo yangemkabili katika safari yake. Kwa hiyo alifanya matayarisho ya kutosha tena mapema. Hakutaka kukutana na vizuizi katika kuvuka majimbo kadha wa kadha, hivyo alichukua pasi yake ya kusafiria, Viza na ruhusa kutoka Irani hadi Israel. Hivyo, viongozi wazuri ni vizuri wajue wazi mahitaji yao na kuweka mikakati kwa makini.

7.     Viongozi wa kiroho waliopevuka humshirikisha Mungu na Wanadamu. Neh 2:8-9

Nehemia alimtegemea Mungu, kwanza alimpa utukufu wote kwa mahitaji yake yote, pili alimwomba Mfalme amsaidie kwa kumpa ruhusa na vibali vifaavyo, nyenzo za ujenzi na Ulinzi katika safari yake.

Sisi sote tunahitajika kumtegemea Mungu na Wanadamu wengine wanaoweza kutusaidia.

8.     Viongozi sharti wajue jinsi ya kutumia mamlaka. Neh 2:9

Barua alizopewa Nehemia na Mfalme zilikuwa hati muhimu za utambulisho, kwa maana hiyo hakuzificha alitambua thamani ya hati hizo na akazitumia kikamilifu.

Twahitajika kujua kama Viongozi kujizoeza kutumia rasilimali zetu tulizopewa na Mungu hivyo tujue ni wapi tutumie asilimali gani na wakati upi?.

9.     Viongozi wa kiroho sharti wajue jinsi ya kutunza Siri. Neh 2:11,16

Viongozi wa kiroho ni mawakili wa Siri za Mbinguni. Wanazo hekima, maarifa na akili za kawaida hawana upungufu katika fahamu zao hivyo hawapaswi kuwa Waropokaji hovyo. Nehemia alijua jinsi ya kuficha Siri. Viongozi tunapaswa tuwe kama Nehemia. Kuna mambo ambayo hayatakiwi kusemwa wazi kabla ya Wakati wake, haujafika.

Tuwe watu wa Siri kupitia Mikutano yetu ya Kiofisi, Mikutano ya Bodi, kumbukumbu za Mikutano hii haistahili kutolewa nje.

Mfalme Hezekia aliingia Shida hii ya kutoa Siri akawa habari kauzwa. Tukiwa habari kauzwa katika jamii sisi tulio Viongozi matokeo yake watu hawatatuamini tena.

10.  Viongozi wa kiroho ni vizuri wawe ni watu wanaoweza kufanya Utafiti. Neh 2:13-15

Nehemia alitaka kujua hasa uharibifu wa Yerusalemu ulikuwa wapi na ni mahali gani panapohitajika kukarabatiwa.

Utafiti utakaoufanya na uchanganuzi utakusaidia wewe kuweka maazimio Fulani. Aidha utakusaidia wewe kuweka mikakati yako vizuri. Ukifanya hivyo utajua ni kiwango gani cha fedha unachohitaji na kazi yenyewe itachukua muda gani.

11.  Viongozi wa Kiroho wanatakiwa wawe wa kwanza kutoa habari mbaya. Neh 2:17

Nehemia aliwaambia watu wazi wazi kile walichokuwa wanakiona kwa macho yao kila siku. Hata watu wa Yerusalemu wenyewe walikuwa wamechoshwa na kukiona kifusi katika mji wao. Kwa hiyo hawakuweza tena kuvumilia dhihaka kutoka kwa maadui zao.

Ikiwa unataka kuwashirikisha watu jambo Fulani anza pale mnapokubaliana kila mmoja huweza kusikia maumivu, hivyo panahitaji msaada . Na kwa pamoja mtatafuta ufumbuzi.

12.  Kama Viongozi wa kiroho na wasimamizi wa Utendaji kazi ni sharti wawe tayari kutoa sababu kwa nini kazi ifanywe. Neh 2:17-18

Kama Viongozi tunaitajika kuwasiliana na watu tunaowaongoza kwa njia ambayo ni ya kueleweka na kuweka wazi lengo la kuwaomba kuifanya kazi, tujaribu kuvuta tuwezavyo kuvuta mantiki yao, hadhi yao na Umakini wao katika kuelewa mambo pamoja na hisia zao. Usiwaombe wakutii tu pasipo kuwaelezea faida za Utii wao, kwa kufanya kazi ile.

13.  Viongozi wa kiroho sharti waweze kuambukiza wengine. Neh 2:18

Katika kuwapa watu changamoto na kuwaonyesha suluhisho lililoko juu ya jambo Fulani. Viongozi sharti wawe na mtazamo mzuri wa kutarajia mafanikio. Tuwe na ile hali ya kuwaambukiza wengine, ikiwa wewe ni kiongozi asiye na haiba kubwa wala kipawa cha Usemi, basi ni bora kumtafuta msemaji mzuri kama Musa alivyotafuta na kumchagua nduguye Haruni.

Viongozi wazuri huwatoa watu kutoka kwenye mawazo butu ya kitumwa, mawazo ambayo humfanya mtu kujiona kama mtu asiyefaa asiye na uwezo wowote wa kuyadhibiti mazingira yake. Ni jukumu lako kuwatia moyo kuwa wana uwezo.

14.  Viongozi wa kirohoni Sharti wawe tayari kupambana na Upinzani. Neh 2:19.

Mtihani mgumu kwa Kiongozi wa kiroho ni pale ambapo unakwenda kupambana na kukabiriana na hali Fulani ya hatari na upinzani. Adui alimdhihaki Nehemia na kusema kwamba yeye alikuwa akiasi sheria. Nehemia hakubishana na Adui wala kujitetea bali alisema tu kila alichokuwa anaamini kwamba Mungu alikuwa amewafanikisha kwa kusisitiza aliongeza kusema kila mtu alihusika kujenga ule ukuta wa Yerusalemu.

Ni juu yetu kama Viongozi kupambana na Upinzani ambao unaweza kujitokeza kwenye huduma zetu, Makanisa yetu na nyumba zetu.

15.  Viongozi wa kiroho sharti wamjulishe Adui yao hatari zinazomkabili.

Nehemia aliwajulisha Maadui zake kwamba hawana sehemu katika kazi yake, na pia wasifikirie kuwa kazi itakapokwisha watafurahia matunda yake, ni wazi wao wako kinyume na mpango wa Mungu. Kule kumwambia Adui waziwazi kwamba hana Urithi wowote katika kazi ya Mungu, kulijenga Imani ya kiongozi pamoja na wale anaowaongoza, wale waliokuwa wanajenga walitambua kwamba kazi yao siyo bure.

16.  Viongozi wa kiroho sharti wasiwabague wanawake. Neh 3:12

Katika kujenga upya Ukuta wa Yerusalemu, Nehemia aliwahusisha wanawake pia.  Wanawake bila shaka yoyote wana sehemu za Uongozi Neno linasema, “Mimi niliwatoa katika nchi ya Misri, Nilikomboa kutoka Utumwani niliwapeni Musa, Haruni na Miriam ili kuwaongoza. Huyu Mama Miriamu naye alikuwa Kiongozi. Wanawake katika Uongozi hutoa mchango mkubwa ambao hauwezi kupatikana kwa Wanaume, wanawake ni Viungo muhimu katika kufanya maamuzi katika kazi ya Mungu na hata Biashara.

17.  Viongozi wa kiroho wanatakiwa wawape watu Uongozi au majukumu kulingana na Uwezo wa mtu alivyo. Neh 3:13-14

Nehemia kama msimamizi mkuu alijua vema ni nani anafaa kwa kazi ipi na wap. Ni vizuri kuwajua wasaidizi wako kila mmoja anaweza kufanya nini na ukishawagawia ujitahidi kama Kiongozi kupata ripoti za mara kwa mara. Hakikisha unajua kila mtu anafanya kazi gani, chunguza ujue iwapo kazi anayofanya mtu huyo ina matokeo mazuri au ni kazi ya kupoteza wakati tu.

Jiulize, je unaoufahamu wa kutosha kuhusu kazi zinazofanywa? Je, unamjua kila mtu na kazi yake? Je, utafanya nini uwe kama Nehemia?

18.  Viongozi wa kiroho waliokomaa wawe tayari kukabiliana na shutuma. Neh 4:1-2, 4.

Kukabiliwa na shutuma ni sehemu moja katika Uongozi, ikiwa wewe kama Kiongozi hushutumiwi basi huenda wewe siyo kiongozi mzuri au hata labda Uongozi wako hauna athari zozote nzuri. Pamoja na kwamba kuna shutuma mbaya, pia zipo nzuri. Watu wanaweza kushutumiwa kwa njia ya upendo na kututoa katika makosa Fulani ya Kiuongozi kwa njia hii tunaweza kuboresha Uongozi wetu.

Njia pekee ya kupambana na Upinzani mkali katika kazi siyo kujitapa na kupayapaya bali ni kulipeleka mbele za Mungu kwa njia ya Maombi. Nehemia alimimina moyo wake kwa Mungu wake na kwa njia hiyo akaweza kupata nguvu mpya za kumwezesha kuendelea na kazi ya ujenzi.

19.  Kiongozi wa kiroho ni Sharti awe anaandika ripoti za Maendeleo ya kazi yake. Neh 4:6

Wewe kama kiongozi hakikisha unafuatilia kwa makini maendeleo ya kazi na halafu unawataarifu watu juu ya maendeleo hayo. Watu huwa wanataka kujua jinsi kazi inavyoendelea.

20.  Viongozi wa kiroho ni lazima wajue jinsi ya kuyatatua matatizo. Neh 4:9

Nehemia aliambatanisha Maombi pamoja na Vitendo. Kazi nyeti ya Kanisa na hata kama kazi nyingine ni kutatua matatizo kama Yesu alipokuja alikuja kuyatatua matatizo Duniani. Matatizo hayawezi kutuondokea kwa kuyafumbia macho na kuyachukulia kama hayapo. Wewe Kiongozi usiharakishe kusuruhisha matatizo. Kama wewe Kiongozi huna Uwezo wa kutatua tatizo Fulani tafuta mtu anayeweza kukusaidia kutekeleza kazi hiyo.

21.  Kiongozi wa kiroho aliye makini huwasikiliza watu waliovunjika Moyo. Neh 4:10

Wajenzi wa Ukuta wa Yerusalemu walikuwa wanazifuata hisia zao na kuathiriwa na Uchovu uliowazunguka. Walipotazama mlima wa kifusi hali ya kujiamini ilitoweka. Wakati tunapokosa kujiamini hali ya kuvunjika Moyo hujipenyeza ndani yetu. Viongozi sharti wawe makini kutambua wakati unaposikia shutuma Fulani jaribu kutafuta chanzo chake, kwa sababu watu wanaokashifu hudidimiza hamasa na matumaini ya watenda kazi. Inapofikia hapo ni jukumu la Viongozi kuingilia kati na kujenga upya Imani ya Watenda kazi. Kufaulu kwako kunategemea hamasa ya watenda kazi wako, kwa hiyo ni lazima Uwatie Moyo.

22.  Kiongozi mzuri ni Yule anayesikiliza malalamishi ya watu. Neh 5:5-8

Katika mji wa Yerusalemu kulikuwa na Unyanyasaji uliokuwa kama Utumwa. Wayahudi matajiri waliwanyanyasa wale waliokuwa maskini. Basi shida zilipozidi watu walimkimbilia Kiongozi wao kutoa kilio chao.  Viongozi sharti wawe watu wanaoweza kusikiliza vilio vya watu. Usiyafumbie macho matatizo ya watu. Ikiwa wewe husikilizi malalamiko ya watu, basi unaishi katika ulimwengu usiokuwa halisi. Watu hawatakuheshimu ikiwa utayapuuzia malalamiko yao na kutowasaidia kwa njia yoyote ile.

23.  Viongozi wazuri wa kiroho sharti wawe watu wanaoweza kutenda kile wanachosema. Neh 5:15.

Ukiwa wewe ni Kiongozi usiache kuonyesha mwenendo wako waziwazi. Wakati watu wanauona mwenendo wako kuwa mzuri na jinsi unavyoishi na kuyatekeleza mambo yako ya kila siku kwa njia ifaayo watakutegemea na kukuiga. 2 Kor 8:21

24.  Viongozi makini sharti wawe tayari kupuuzia baadhi ya Mialiko isiyo na maana. Neh 6:1-2

Viongozi sharti wawe na uwezo wa kuweza kutambua mitego iliyotegwa ili kuwanasa. Sisi sote twastahili kuwa na Uwezo wa kugundua hila Fulani inapopangwa. Ijapokuwa makongamano ni muhimu na huleta Baraka nyingi, wakati mwingine yanaweza kuwa njia ya kupoteza wakati. Nehemia alitambua kwamba mwaliko ule ulikuwa mtego tu. Viongozi lazima tugundue ni mkutano upi tuhudhurie na upi tusihudhurie. Usiitikie kila Mwaliko unaoupata.

25.  Kama Kiongozi jitahidi kutumia Vipawa vya watu wengine. Neh 8:2-3, 7-8

Wewe kama Mchungaji Kiongozi sharti uwaalike watu wengine Kanisani kwako kuja kuhudumia. Alika watu wenye Vipaji tofauti na wewe ili waweze kulisaidia kanisa lako kulikuza kiroho. Alika wale walio wanyenyekevu katika huduma zao.

SEHEMU YA MWISHO.

VIONGOZI WA KANISA NA WATAWALA WANAVYOWEZA KUONGOZA MIKUTANO NA VIKAO.

UTANGULIZI.

Mikutano na Vikao vimekuwa ni sehemu ya kazi na mila popote ambapo kuna jumuia au mkusanyiko wa watu hasa kipindi kile cha kutaka kufikia maamuzi ya pamoja. Na umuhimu wa Vikao utazidi kuongezeka kadri maendeleo ya mitazamo tofauti inavyoongezeka. Kuna kipindi watu hawana haja ya vikao kwa sababu wanadai Vikao vingi vinadhoofisa utekelezaji Kwakuwa vikao vingi huwa havina lengo la wazi au huchukua muda mrefu kuliko inavyostahili. Lakini ukweli usiopingika kwa sasa watu hupenda vikao sana ingawa nayo pia ina kasoro zake maana watu hupenda kuzungumza mno kwenye vikao, na hutumia muda mwingi na kudhoofisha utekelezaji.

Kazi ya kuandaa na kuendesha mikutano na vikao ni miongoni mwa kazi zinazokwepwa sana na watu wengi sababu kubwa ya kukwepakazi hii ni kuwa hawajui namna ya kuifanya. Hatuwezi kuwalaumu watu hawa kwa sababu hawajapata bahati ya kuendelezwa wala kupewa mbinu za utaratibu wake.

Kiongozi anapokabiliwa na kazi ya kuandaa au kuendesha mikutano kwa mambo mengi ya kushughulikia.

1.             Kutafakari na kuzielewa shabaha za Mikutano.

2.             Kuyaelewa mambo vizuri yatakayojadiliwa.

3.             Kuitisha mikutano na Vikao.

4.             Kuendesha Vikao na kuhakikisha kuwa Shabaha zake zinafikiwa.

5.             Kuweka kumbukumbu za vikao na Mikutano, kwa njia ya Mihutasari.

Mafanikio yoyote ya Vikao na Mikutano hutegemea sana maandalizi na Uendeshaji wake. Mbinu za uandaaji na uendeshaji wa mikutano na vikao hutofautiana, kwa mfano Uandaaji na Utendaji wa Mkutano wa Kamati ni tofauti na ule wa Mkutano mkuu. Kwa hiyo Viongozi ni vema kuelewa mahitaji ya kila aina ya Mkutano au Kikao.

Mwongozo huu utaweza kuwasaidia Viongozi wote wanaohusika na Mikutano na Vikao mbalimbali kama vile Wenyeviti, Makatibu, Wakurugenzi na Wahudumu waaandaaji wote watajua jinsi ya kuendesha Vikao na Mikutano kwa kufuta Miongozo mizuri.

I.                MAHITAJI YA MKUTANO.

Kwa kawaida Mkutano aina yoyote unahitaji vitu vinne, Mwenyekiti, Katibu, Ajenda na Wajumbe.

a)     Mwenyekiti – huyu ndiye kiongozi wa mkutano aliye na majukumu yafuatayo.

1.     Kutoa Uamuzi wa kuitisha mkutano.

2.     Kuidhinisha Ajenda za Mkutano.

3.     Kufungua mkutano.

4.     Kuendesha Mkutano.

5.     Kuhakikisha kuwa shabaha za mkutano zinatimizwa.

6.     Kuhakikisha kuwa Wajumbe wanapewa nafasi sawa za kuuliza maswali, kushiriki katika majadiliano na kutoa mapendekezo.

7.     Kupiga kura ya Uamuzi iwapo kura za wajumbe zitalingana.

8.     Kufunga Mkutano.

b)     Katibu – Huyu ni mwandishi katika Mkutano aliye na majukumu yafuatayo.

1.          Kutoa taarifa au tangazo la mkutano baada ya kuagizwa na Mwenyekiti.

2.          Kuhakikisha kuwa watu wote wanaohusika wanapata taarifa ya Mkutano.

3.          Kuhakikisha kuwa watu walioalikwa kuzungumza kwenye Mkutano wanapewa Taarifa mapema ili waweze kujitayarisha.

4.          Kuandaa mahali pa mkutano.

5.          Kusoma na kufafanua Ajenda za Mkutano.

6.          Kusoma muhitasari wa Mkutano uliopita.

7.          Kuandika muhitasari wa Mkutano.

c)     Ajenda – Ni mambo yatakayozungumzwa kwenye Mkutano.

1.     Kufungua Mkutano.

2.     Kuthibitisha muhitasari wa mkutano uliopita.

3.     Yatokanayo na muhitasari wa mkutano uliopita.

4.     Taarifa zitakazotolewa kwenye mkutano.

5.     Mambo yatakayojadiliwa.

6.     Matatizo yanayohitaji ufumbuzi.

7.     Mengineyo.

8.     Kufunga mkutano.

d)     Wajumbe – Hawa ndiyo washiriki wa mkutano. Halimashauri au wanakamati.

Majukumu ya hawa wajumbe ni kama ifuatavyo:-

1.     Kuitikia Wito wa mkutano kwa tarehe zilizopangwa.

2.     Kubuni Ajenda za mambo yanayostahili kujadiliwa na kuzipeleka kwa Katibu mapema kabla ya kujadiliwa.

3.     Kuthibitisha muhtasari wa mkutano uliopita.

4.     Kutoa mapendekezo.

5.     Kuuliza maswali.

6.     Kushiriki katika majadiliano.

7.     Kupiga kura.

8.     Kushiriki katika maamuzi.

9.     Kushiriki na kufuatilia maamuzi yanayotekelezwa.

II.              MATAYARISHO.

Mafanikio yoyote ya Mikutano hutegemea sana maandalizi mazuri. Baada ya kuitisha mkutano inabidi Ajenda zipangwe na taarifa ya Mkutano iandaliwe na kusambazwa, na mahali pa kufanyiwa Mkutano paandaliwe.

a)     Taarifa ya mkutano izingatie mambo muhimu kama vile:-

1.     Taja jina la Mkutano.

2.     Taja siku na tarehe ya mkutano.

3.     Taja saa ya kuanza mkutano.

4.     Taja mahali pa mkutano.

5.     Taja Ajenda za kujadiliwa.

Kwa mfano:-

1.     Kufungua mkutano.

2.     Kuthibitisha muhitasari wa Mkutano uliopita.

3.     Yatokanayo na muhitasari wa Mkutano uliopita.

4.     Kupanga tarehe za Crusade.

5.     Kupanga bajeti za Crusade.

6.     Mengineyo

7.     Kufunga kikao.

b)     Baada ya kuandaa hii taarifa inapaswa isambazwe kwa Wajumbe wote bila ubaguzi.

c)     Mahali panapofanyiwa mkutano paandaliwe mapema ili kuondoa usumbufu.

d)     Viandaliwe vifaa muhimu vya mkutano huo na katibu ndiye mhusika – andaa Meza, Viti na vitendea kazi vingine.

e)     Mahali pa Mkutano panga viti kimuduara au pembe msitatili au pembe mraba kwa kusudi la Wajumbe waweze kuonana wakati wa kuzungumza.

III.            NAMNA YA KUENDESHA MKUTANO.

a)     Shughuli za mwanzo.

Kabla ya Mkutano kuanza wanatakiwa mwenyekiti na katibu wawe wamefika mahali pa mkutano. Mwenyekiti atawakaribisha Wajumbe wakati watakapofika eneo la mkutano.

Kama kuna Muhitasari wa Vikao vilivyopita katibu agawe zile Mihutasari Wajumbe waanze kuzipitia kabla ya mkutano kuanza. Mkutano ufunguliwe Wajumbe wanapokuwa wametimia koramu. Kiwango kinachotumika mara nyingi katika mikutano mingi ni mbili ya tatu au nusu ya Wajumbe wote jumla yao ni pamoja na wale waliotoa taarifa ya kutohudhuria.

b)     Kufungua mkutano.

Iwapo kiwango kimetimia Mwenyekiti atafungua rasimi mkutano kwa kuwashukuru Wajumbe waliofika. Ataeleza madhumuni ya mkutano kwa kifupi akitilia mkazo mambo yale ya muhimu yatakayojadiliwa. Pia, kama kuna wageni awatambulishe kwenye mkutano.

c)      Kukariri Ajenda.

Mara baada ya Ufunguzi wa Mkutano ni vizuri katibu awasomee wajumbe Ajenda za Mkutano. Pengine inaweza kuwa na Msaada zaidi kama zitaandikwa kwenye Ubao kama upo.

d)     Kuthibitisha Muhitasari wa mkutano uliopita.

Ikiwa mkutano unaofanyika ulitanguliwa na mwingine, ni wajibu wa Wajumbe kuthibitisha Usahihi wa mkutano uliopita. Mwenyekiti atamwomba Katibu asome ule Muhtasari na wajumbe wakiwa wanasikiliza na kufuatilia kwa makini zaidi. Mwishoni atawaulikza wale wajumbe kama yalivyosomwa ndivyo yalivyo. Kama Wajumbe wataridhika na ule Muhitasari Mwenyekiti na Katibu wataweka sahihi zao.

e)     Yatokanayo na Mhitasari wa mkutano uliopita.

Baada ya Muhitasari wa mkutano uliopita kuthibitishwa, taarifa za utekelezaji wa maagizo na maazimio yake zitatolewa. Muhitasari ule unachunguzwa kwa makini tangu mwanzo hadi mwisho. Unaweza kusomwa hatua kwa hatua kama Mwenyekiti ataamua hivyo.

f)      Mijadala ya Ajenda maalumu.

Baada ya kushughulika na Mhitasari wa mkutano uliopita Ajenda zitakazofuata zitahusu mambo mapya ambayo ni maalumu kwa mkutano huo. Ajenda hizo hazina budi kujadiliwa kwa ukamilifu moja baada ya nyingine.

Mwenyekiti ahakikishe kuwa wajumbe wanapewa nafasi ya kuuliza maswali kutoa mapendekezo, kupiga kura n.k

Utaratibu ufuatayo unaweza kusaidia katika kufanikisha majadiliano kwenye mkutano.

1.              Utaratibu wa maswali na majibu. Mjumbe yeyote anayetaka kutoa maelezo au kuuliza maswali hana budi kunyoosha mkono ili kumgutua Mwenyekiti apate kumwona na kumruhusu kusema. Kila mjumbe asizungumze bila ruhusa ya Mwenyekiti.

2.              Utaratibu wa kujadili hoja. Hoja ni kitu gani?

Ni neno au jambo lililoungwa mkono baada ya kutolewa na mjumbe mmojawapo katika mkutano. Linapotolewa kwa mara ya kwanza huwa ni “Pendekezo” linapoungwa mkono sasa huwa ndiyo hoja. Wakati wa kujadiliwa hoja Mwenyekiti akaribishe maoni mbalimbali ya Wajumbe na hatimaye kama ni lazima, kura ipigwe ikiwa na shabaha ya kuunga mkono ile hoja au hapana. Iwapo wajumbe wengi wataiunga mkono hoja hiyo itakuwa ni Azimio ambalo lazima litekelezwe.

3.              Taratibu za Upigaji kura.

            Kura hupigwa na Wajumbe wa Mkutano, wale waliokaribishwa pamoja na Wataalamu kama walikuwepo hawaruhusiwi kupiga kura. Hata hivyo kura zikipigwa na kulingana, Mwenyekiti ataamua apigie Upande gani ili kukata Shauri.

g)     Mengineyo.

Ajenda hii hutangulia kabla ya kufunga Mkutano, ikiwa ni nafasi kwa Wajumbe kuuliza maswali au kutoa taarifa, ambazo hazikuweza kutolewa wakati wa Ajenda zingine. Wakati huu kwa kuwa Wajumbe watakuwa wanaelekea kuchoka hivyo Mwenyekiti ajibu maswali kwa kifupi na kama kuna jambo ambalo linahitaji maelezo ya kutosha liahirishwe hadi mkutano mwingine na jambo hilo lifanywe Ajenda. Mwenyekiti aangalie sana asiruhusu maswali ya Ajenda zilizopita.

h)     Kufunga Mkutano.

Ikiwa mkutano utakuwa umeendeshwa vizuri mambo yote yaliyoandaliwa yatakuwa yamezungumzwa na kujadiliwa kikamilifu. Kabla ya kufunga Mkutano, Mwenyekiti anaweza kama ataona inafaa kutoa Muhitasari wa mambo muhimu. Yaliyozungumzwa na maazimio yaliyofikiwa, atawakumbusha na kuwahimiza Wajumbe kutekeleza yaliyoazimiwa. Atawashukuru Wajumbe kwa kuhudhuria na kutoa mchango wao wa mawazo na atafunga Mkutano kwa Maombi yake au ya Mjumbe yeyote.

4.  KUANDIKA MUHITASARI.

Mojawapo ya majukumu ya kikatibu ni kuandika Muhitasari wa Mkutano. Mikutano mingi inakosa mafanikio kwa sababu ya Ukosefu wa Mihitasari ya kufaa. Mihitasari yenye kufaa hutokana na kuwa na Makatibu walio makini. Ni wajibu wa Katibu kuhakikisha kuwa anasikiliza Vizuri mijadala, Maagizo na maazimio ya Mkutano na baadaye ataketi na kuandika kwa Ufasaha Muhitasari wa mkutano mzima. Wakati wa kuandika Mhitasari inampasa Katibu aeleze kwa kifupi kila Ajenda peke yake kufuatana na jinsi ilivyopangwa.

Katika Mhitasari ataje wajumbe waliohudhuria na pia wale ambao hawakuhudhuria na wale waliomba ruhusa.

Mwisho aandike

MHITASARI UMETHIBITISHWA.

         Katibu                                                                                      Mwenyekiti

………………………                                                              ………………………

HITIMISHO

Ninapomalizia sehemu ya mwisho katika haya mafundisho napenda nimalizie na haya yafuatayo.

I.Kanuni 5 zilizotolewa kwa Musa kuhusu Uongozi na Utawala 2. Mpango wa kiasili wa Utawala.

I. KANUNI 5 ZILIZOTOLEWA KWA MUSA.

1.     Wafunze Wengine kukusaidia Kut 18:13-22

Urasimu wa Utawala wa kidini ni Kujaribu kufanya mwenyewe kazi ambayo Mungu amekuita kuitimiza bila ya Ushauri wa watu wengine, Urasimu wa utawala wa kidini ni kujiweka juu, kujiona. Math 20:27  23:11. Musa alimsikiliza Mungu na Yethro ndipo alipopata Ufumbuzi wa tatizo, nalo lilikuwa ni kuwafundisha wengine, Hes 11:16    18:21-22. Mtu kufundisha mwingine, Ona mafundisho ya Paulo   2Tim 2:2

2.     Kuwafundisha Biblia.

Tunatakiwa tuwape Viongozi wa Kanisa mafunzo ya Biblia ambayo ndiyo yanayotoa Uhai na Uzima wa kiroho kwa watu.  Math 22:29

3.     Waelekeze kazi ya kufanya Kut 18:20

Wale ambao tayari umewapata wawe wasaidizi wasiishie tu kujifunza darasani bali waelekeze kile watakachofanya. Ukimfundisha Mwanafunzi kuongoa Roho. Mara hiyo mpeleke kuongoa roho. Math 10:1-8  Luk 9:1-6

4.     Gusisha Upako

Kugusisha Upako ni sawa na kule kuwasha moto. Washa moto kutoka moto mkubwa na ule moto mkubwa unabaki na nguvu ile ile. Kutoka 11:16-17. Upako ni muhimu katika kuendeleza Uongozi. Kiongozi ambaye hana nguvu za Roho Mtakatifu juu yake hana nafasi ya kufanikiwa. Luk 9:1 Mdo 1:8 Viongozi ambao wana Upako ni vema wafunze wengine.

5.     Gawia wengine mzigo. Hes 11:16-17

Kutawala kibiblia ni tofauti na Viongozi wa kidunia wanavyotumia mamlaka yao. Uongozi wa kibiblia ni kufundisha, kubariki, kuponya, kufungua waliofungwa, kutoa pepo, kusamehe dhambi na kuwaganga waliovunjika moyo. Luk 4:18  Math 20:20-28. Kumbuka kile Gidioni alisema - Waam 8:23. Ni matumaini yangu umeelewa kile Mungu alichosema kwa Musa ndicho anachosema kwako leo wewe ni Musa wa leo.

II. MPANGO WA KIASILI WA UTAWALA.

Mungu ambaye ni muumbaji na mpangaji alipanga utaratibu wa Utawala tangu mwanzoni, Mungu alitamani aendelee kuwa mtawala wa Viumbe vyake ingawa hata wao walipewa kutawala Viumbe. Mw 1:26-27

Kanisa ni vema wajue Mpango wa kiutawala wa tangu asili katika Kut 19:5-6 tunaona mpango wa Mungu aliokusudia tangu asili yeye ndiye mtawala mkuu wa dunia yote. Chini yake ameweka mwanadamu asaidiane naye kama mlinzi mwangalizi. Mpango huu ulikataliwa na mwanadamu, I Samw. 8:5-9. Mtindo wa Utawala huo uliitwa Theocracy neno ambalo linatokana na neno “Theos” na maana ya neno hilo – “MUNGU NDIYE MTAWALA MFALME” alikuwa akisaidiana na waamuzi wakati ule.

Baada ya mwanadamu kukataa huo mfumo wa Utawala wa kitheocracy Mungu aliwaruhusu waendeleze mfumo walioutaka wa Utawala wa Ki-Monarchy, yaani mwanadamu anakuwa yeye ndiye mfalme. Kwa Taifa la Israel ndipo walipotokea watawala kuanzia Sauli, Daudi, Sulemani n.k

Baadaye Utawala wa namna hii ulipungua na kuanzisha Utawala wa aina nyingine unaoitwa wa Democracy, kupitia mfumo huu mtu yeyote anachaguliwa kuwa Rais (Presidential).

Leo hii Mataifa mengi hutumia mfumo huu unaoitwa Democrasia, badala ya Ule wa Kimonarchy hata hivyo bado kuna mataifa machache ambayo bado wanatumia mfumo huo wa kimonarchy.

Mfumo huu wa tatu ambao ndio Unaotawala sasa utafika mwisho wake na ule mfumo wa kwanza wa Theocrasi utajirudia na kwa milele yote. Dan 2:44     4:3   I Kor 15:24-25